ކާއިނާތުގައިވާ ސައިންޓިފިކް އެންމެ ބޮޑު އެއް ސިއްރު ކަމަށްވާ 'ޑާކް މެޓަރ' (Dark matter) ހޯދުމަށް ސައިންސްވެރިން ކުރަމުންދާ މަސައްކަތުގައި ވަރަށް އުންމީދީ ކުރިއެރުމެއް ވަނީ ލިބިފައެވެ. އެމެރިކާގެ ސައުތު ޑެކޯޓާގައި ބިމުގެ އަޑީގައި ގާއިމުކޮށްފައިވާ ދުނިޔޭގެ އެންމެ ޙައްސާސް ޑިޓެކްޓަރ، "ލަކްސް-ޒެޕްލިން" (އެލް.ޒެޑް) ބޭނުންކޮށްގެން ކުރި ތަހުލީލުތަކުގެ ތެރެއިން ވަނީ، އާދަޔާ ޚިލާފު ޕާޓިކަލް ސިގްނަލެއް ރެކޯޑުކުރެވިފައެވެ. މިއީ މިހާތަނަށް ޑާކް މެޓަރ ދެނެގަތުމަށް ކުރެވުނު މަސައްކަތުން ފެނުނު އެންމެ ވަރުގަދަ އަދި އެންމެ އުންމީދީ އެއް ނިޝާން ކަމަށް މި ދިރާސާގައި ހަރަކާތްތެރިވާ ފަރާތްތަކުން ވަނީ ބުނެފައެވެ.
ކާއިނާތުގެ ޖުމްލަ "މާސް" ނުވަތަ ބަރުދަނުގެ ގާތްގަނޑަކަށް 85 އިންސައްތަ ޙިއްޞާކުރަނީ ޑާކް މެޓަރ ކަމަށް ވީނަމަވެސް، މިއީ އަދި މިހާތަނަށް ސީދާ ފެނިފައިވާ ނުވަތަ ދެނެގަނެވިފައިވާ އެއްޗެއް ނޫނެވެ.
ދިޔާ ޒެނޯން ބޭނުންކޮށްގެން ހިންގާ އެލް.ޒެޑް އެކްސްޕެރިމެންޓުން ފެނުނު މި އާ ސިގްނަލަކީ، ޢާންމުކޮށް ފެންނަ ބެކްގްރައުންޑް ސިގްނަލްތަކާ ތަފާތު، އަދި ސައިންސްވެރިން އަންދާޒާކުރި ވަރަށް ވުރެ މާ ބޮޑު ހަކަތައެއް އެކުލެވިގެންވާ ސިގްނަލެކެވެ. މިއީ ޑާކް މެޓަރގެ ބާވަތެއް ކަމަށް ބެލެވޭ "ވިމްޕްސް" (WIMPs) ގެ ސަބަބުން އުފެދުނު ސިގްނަލަކަށް ވުމުގެ ފުރުޞަތު ބޮޑު ނަމަވެސް، ސައިންސްވެރިން ބުނާ ގޮތުގައި މިއީ އަދި ސީދާ ޑާކް މެޓަރކަން މުޅިން ކަށަވަރުވާ މިންވަރުގެ ހޯދުމެއް ނޫނެވެ.
ޖަޕާނުގައި ބޭއްވި ސައިންޓިފިކް ކޮންފަރެންސެއްގައި މި ހޯދުންތައް ހާމަކޮށްފައިވާއިރު، ސައިންސްވެރިން ވަނީ މިއީ ރަސްމީކޮށް އާ ހޯދުމެއްގެ ގޮތުގައި ކަނޑައަޅަން ބޭނުންވާ "5-ސިގްމާ" މިންގަނޑަށް އަދި ފެތޭ ނަތީޖާއެއް ނޫންކަން ފާހަގަކޮށްފައެވެ. މިހާރު ފެނިފައިވާ ނަތީޖާގެ ޔަޤީންކަން ހުރީ 2.6 ސިގްމާގައެވެ. އެހެންކަމުން، މިއީ އާދައިގެ މާއްދާއަކުން އައިސްފައިވާ ސިގްނަލަކަށް ވުމުގެ 0.5 އިންސައްތައިގެ ކުޑަ ފުރުޞަތެއް އަދިވެސް އޮތުމާއެކު، ސައިންސްވެރިން އަންނަނީ އިތުރު ޑޭޓާ އެއްކޮށް، މި އުންމީދީ ސިގްނަލްގެ އަސްލު ޔަޤީންކުރުމަށްޓަކައި ދިރާސާތައް އިތުރަށް ފުޅާކުރަމުންނެވެ.